U mbajt takimi inaugurues i ''Grupit për çështje të komuniteteve’’

Të enjten, më 17 prill, u mbajt takimi inaugurues i ''Grupi për çështje të  komuniteteve'', organizuar nga Zyra për Çështje të Komuniteteve, dhe i kryesuar nga Drejtori i Zyrës, z.Srdjan Popovic.

Themelimi i  këtij grupi punues është mbështetur plotësisht nga Zyra e Kryeministrit. Në këtë  takim janë prezantuar gjetjet e deritanishme lidhur me njohjen e diplomave të Universitetit të Prishtinës me seli në veri të Mitrovicës, si dhe planet e ardhshme për gjetjen e mekanizmave që kontribuojnë në gjetjen e zgjidhjeve për njohjen e diplomave të përmendura më lart.

Prezantimin e bëri Qendra Evropiane për Çështje të Pakicave, kurse i tërë projekti ka për qëllim të inkuadrojë të gjitha institucionet relevante të Kosovës në zgjidhjen e këtij problemi, si dhe ambasadat dhe organizatat ndërkombëtare.

Drejtori i Zyrës për Çështje të Komuniteteve dhe Kryesues i Grupit të punës, z.Srdjan Popovic, me këtë rast theksoi se krijimi i këtij grupi të punës  është  me rëndësi thelbësore për zgjidhjen e të gjitha problemeve me të cilat përballen komunitetet. Ai gjithashtu theksoi se ky  grup i punës do të merret  me të gjitha nevojat dhe shqetësimet e komuniteteve, dhe  se do të punojë  në rekomandimet specifike për t'i  zgjidhur këto probleme në mënyrë më efikase.